“Barselonanyň” goragçysy Žerar Pike sosial ulgamlarda katalon klubundan gidýändigi we karýerasyny tamamlaýandygy barada habar berdi. 35 ýaşly futbolçy hoşlaşyk wideosyny ýerleşdirip, onda özüniň gelen netijesi barada aýtdy. La Liganyň 13-nji tapgyrynyň “Almeriýa” bilen oýny Pike üçin “Barselonada” iň soňky oýun bolar. Bu barada championat.com habar berýär.
“Siz [Barselonanyň janköýerleri] maňa ähli zady berdiňiz, indi bolsa, çaganyň arzuwlary hasyl bolandan soň men bu tegelegi ýapmagyň wagty gelendigini aýtmak isleýärin. Men “Barsadan” soň başga toparyň bolmajakdygyny hemişe aýdardym we bu, hakykatdanam, şeýle. Şu şenbe güni “Kamp Nouda” meniň iň soňky oýnum bolar” – diýip, Pike wideoda aýtdy.
Pike “Barselonanyň” ýetişdiren oýunçysydyr, 2004-nji ýylda ol “Mançester Ýunaýtede” geçdi, 2006-njy ýylda bolsa “Real Saragosa” ýyllyk kärendesine iberildi, 2008-nji ýylda “Barselona” gaýdyp geldi.
Bu döwürde “Barselona” bilen bilelikde Ispaniýanyň çempionatynda 8 gezek, Ispaniýanyň Kubogynda 7 gezek, Ispaniýanyň Superkubogynda 6 gezek, Çempionlar ligasynda 3 gezek, UEFA-nyň Superkubogynda 3 gezek we Klublaýyn dünýä çempionatynda 3 gezek ýeňiş gazandy. 2010-njy ýylda ispan Premýerasynyň iň gowy goragçysy diýlip bellenildi, şol ýyl ol Ispaniýanyň milli ýygyndysynyň düzüminde dünýä çempiony boldy. Milli topar bilen bilelikde Ýewro-2012-de hem ýeňiş gazandy.
