Iňlis diliniň düşündirişli sözlügini çykarýan Harper Collins neşirýaty “permacrisis” (“permakraýsiz” ýa-da “hemişelik çökgünlik”) sözüni 2022-nji ýylyň sözi diýip kesgitledi. Bu barada neşirýatyň resmi saýtynda habar berilýär diýip, TASS belleýär.
Sözlügi düzüjiler bu düşünjäni “durnuksyzlygyň we durnuksyz ýagdaýyň dowamly döwri” hökmünde häsiýetlendirýärler. Olar gelnen netijäniň sebäbini hut şu sözüň 2022-nji ýylyň köp adamlar üçin näderejede ýaramaz bolandygyny gysga görnüşde we takyk görkezýändigi bilen düşündirýärler.
Mundan başga-da, Harper Collins hem Britaniýanyň içindäki, hem halkara derejesindäki wakalary göz öňünde tutup, häzirki ýagdaýy takyk suratlandyrýan ýene dokuz sözi saýlady. Olaryň arasynda “Kiýew”, “partygate” (partigeýt) ýaly dünýäde bolup geçýän wakalar bilen bagly sözler, şeýle-de “warm bank” söz düzümi bar. Ol “hususy öýlerini ýyladyp bilmeýän adamlaryň baryp biljek ýyly ýerini” aňladýar.
2022-nji ýylyň sözleriniň onlugynda “splooting” (penjelerini ýazyp ýatan haýwanyň rehimli durşy), “lawfare” (garşydaşy gorkuzmak ýa-da päsgel bermek üçin ýuridiki mehanizmleriň ulanylmagy), “quiet quitting” (ýuwaş işden çykarmak), “sportswashing” (gapma-garşy işlerden ünsi sowmak maksady bilen sport çäreleriniň ýaýbaňlandyrylmagy) we “vibe shift” (agalyk ediji atmosferanyň ýa-da medeniýet gurşawynda tendensiýanyň düýpli üýtgemegi) ýaly sözler hem bar.
2021-nji ýylda Harper Collins ýylyň sözi hökmünde NFT abbrewiaturasyny saýlady, 2020-nji ýylda ol “lockdown” boldy.
