Türkmenistan ýylyň başyndan bäri Hytaýa iň uly gaz iberiji boldy. Diňe awgust aýynda HHR 2,9 mlrd kub metr türkmen gazyny satyn aldy diýip, Hytaýyň Baş gümrük administrasiýasynyň maglumatlaryna salgylanyp, interfax.ru habar berýär.
Awgust aýynda Hytaýa gaz ibermek boýunça Türkmenistan hatda HHR-e 2,4 mlrd kub metr gaz eksport eden Russiýadan hem öňe geçdi.
“Awgust aýynda Hytaý Russiýadan 409,37 mln dollar bahada tebigy gaz import etdi. Bu görkeziji 2017-nji ýylyň ýanwar aýyndan bäri iň ýokary görkezijidir” – diýip, RF-iň DIM-niň HHR-däki metbugat gullugy belledi.
Hytaýa gaz eksport edijileriň arasynda üçünji orny awgust aýynda 2,278 mlrd kub metr iberen Awstraliýa eýeleýär.
Umuman, 2022-nji ýylyň awgust aýynda Hytaý 13,196 mlrd kub metr gaz (-4%), şol sanda turbageçirijiler arkaly 5,528 mlrd kub metr (+10%) we suwuklandyrylan tebigy gaz görnüşinde 7,668 mlrd kub metr (5,897 mln tonna) satyn aldy.
Türkmenistan subut edilen tebigy gaz gorlary boýunça dünýäde dördünji orny eýeleýär. Türkmen tebigy gazynyň üpjünçiliginiň esasy göwrümi Türkmenistan – Özbegistan – Gazagystan – Hytaý transmilli gaz geçirijisiniň üç liniýasy arkaly Hytaýyň paýyna düşýär. Dördünji şahany Türkmenistan – Özbegistan – Täjigistan – Gyrgyzystan – Hytaý ugry boýunça geçirmek bellenildi. Türkmen gazynyň Hytaýa iberilişi ýylda 65 mlrd kub metre ýeter diýlip çak edilýär. 2021-nji ýylda Hytaýa, takmynan, 34 mlrd kub metr türkmen gazy iberildi.
Türkmenistan Russiýa we Azerbaýjana Eýranyň üsti bilen, Özbegistana Russiýanyň “Gazpromy” arkaly gaz iberýär.
