Golliwud aktrisasy Anjelina Joli režissýor Pablo Larrainiň opera aýdymçysy Mariýa Kallasa bagyşlanan baýopikinde baş keşbi ýerine ýetirer. Bu barada “Variety” habar berýär diýip, lenta.ru belleýär.
Kartina “Mariýa” adyny aldy. Film asly grek bolan meşhur amerikaly aýdymçynyň ömrüniň ahyrky günleri barada gürrüň berer.
“Men özümiň iki esasy hyjuwymy – kino bilen operany birleşdirmegi öňden bäri arzuw edýärdim. Muny Anjelina Joli, iň batyrgaý we bilesigeliji artist bilen etmek – juda uly mümkinçilik we hakyky sowgat” – diýip, Larrain belleýär.
Kinolentanyň ssenariýaçysy Stiwen Naýt bolar. Filmiň surata düşürilip başlanjak senesi heniz aýan edilmeýär.
