Türkmenistanda Sport we ýaşlar syýasaty ministrligi işini bes edip, onuň binýadynda Türkmenistanyň Bedenterbiýe we sport baradaky döwlet komiteti döredildi. Degişli karar penşenbe güni geçirilen Hökümet mejlisiniň barşynda kabul edildi.
Serdar Berdimuhamedowyň gol çeken resminamasyna laýyklykda, Bedenterbiýe we sport baradaky döwlet komiteti işini bes eden Türkmenistanyň Sport we ýaşlar syýasaty ministrliginiň hukuk oruntutary diýlip kesgitlenildi.
Hökümet mejlisiniň barşynda wise-premýer N.Amannepesow bu kararyň Magtymguly adyndaky Ýaşlar guramasynyň VII gurultaýynda kesgitlenen wezipeleri ýerine ýetirmek maksadyna gönükdirilendigini belledi.
«Ýaşlar barada döwlet syýasaty hakynda» Türkmenistan Kanunynyň rejelenen görnüşiniň 10-njy maddasyna laýyklykda, Bilim ministrligi ýaşlar barada döwlet syýasaty çygrynda döwlet düzgünleşdirmesini we gözegçiligini amala aşyrýan ygtyýarly edara bolup durýar.
