10-njy oktýabrda Prezident Serdar Berdimuhamedow Ministrler Kabinetiniň giňişleýin mejlisini geçirdi. Onda ykdysadyýetiň pudaklarynda şu ýylyň dokuz aýynda alnyp barlan işleriň jemleri jemlenildi, Prezident Maksatnamalarynyň we ýurdumyzy durmuş-ykdysady taýdan ösdürmek boýunça kabul edilen beýleki maksatnamalaryň ýerine ýetirilişi ara alnyp maslahatlaşyldy.
Mejlise Milli Geňeşiň wekilleri, welaýatlaryň häkimleri, ýokary okuw mekdepleriniň rektorlary, gazet-žurnallaryň redaktorlary hem-de beýleki ýolbaşçylar çagyryldy. Onda degişli ýolbaşçylaryň hasabatlary diňlenildi, ýerine ýetirilen işlere anyk baha berildi we ýakyn geljek üçin ileri tutulýan wezipeler kesgitlenildi. Gün tertibine laýyklykda, şu ýylyň dokuz aýynda halk hojalyk toplumynyň pudaklarynyň durnukly ösüşini tassyklaýan makroykdysady görkezijiler barada hasabat berildi. Ýangyç-energetika, senagat, gurluşyk, söwda, dokma, obasenagat toplumlarynda, ylym, bilim, saglygy goraýyş, sport, medeniýet ulgamlarynda, ulag-kommunikasiýa pudagynda, daşary syýasatda döwlet Baştutanymyzyň ozal beren tabşyryklaryny ýerine ýetirmek hem-de öňde goýlan wezipeleri çözmek maksady bilen, ýanwar — sentýabr aýlarynda alnyp barlan işleriň netijeleri hasabatlaryň özenini düzdi. Şeýle-de Hökümetiň giňişleýin mejlisinde ýurdumyzyň kanunçylygyny kämilleşdirmek babatda alnyp barylýan işler hakynda hasabatlar diňlenildi.
Prezident Serdar Berdimuhamedow Ministrler Kabinetiniň giňişleýin mejlisine gatnaşyjylara ýüzlenip, ýerine ýetirilen işleriň netijeleriniň, dünýä ykdysadyýetinde ýüze çykan kynçylyklara garamazdan, Garaşsyz Watanymyzyň üstünlikli ösmegini dowam etdirýändigini aýdyň görkezýändigini belledi. Jemi içerki önüm 6,2 göterim artdy. Daşary söwda dolanyşygy, geçen ýylyň degişli döwrüne garanyňda, 40 göterim ýokarlandy. Maliýeleşdirmegiň ähli çeşmeleriniň hasabyna özleşdirilen düýpli maýa goýumlaryň möçberi 20 milliard manatdan gowrak bolup, 2021-nji ýylyň degişli döwri bilen deňeşdirilende, 13 göterim artdy.
Döwlet Baştutany öňde durýan wezipelere ünsi çekip, şu ýyly gowy netijeler bilen tamamlamak üçin hemmeleriň yhlas bilen işlemelidigini, ykdysadyýetiň ähli pudaklarynda oňyn netijeleri gazanmak we jemi içerki önümiň ösüş depginini durnukly saklamak babatda çäreleri görmegiň zerurdygyny nygtady. Şeýle-de ilkinji nobatda, geljek ýylyň Döwlet býujeti boýunça ýene-de maslahat geçirmek we onuň ähli maddalaryna garamak barada görkezme berildi.
Mejlisiň ahyrynda Prezident Serdar Berdimuhamedow oňa gatnaşanlary şu gün ýurdumyzda giňden baýram edilýän Türkmenistanyň saglygy goraýyş we derman senagaty işgärleriniň güni bilen gutlady hem-de baýramçylyk mynasybetli bu ulgamyň işgärlerini döwlet sylaglary bilen sylaglamak hakynda Permana gol çekdi.
