Amerikalylaryň 31-nji oktýabrda Hellowin baýramyny bellemek üçin çykdajylary bassyr ikinji ýyl rekord derejä – bu gezek 10,6 mlrd dollara ýetip biler. Muny Milli bölek söwda federasiýasynyň (NRF) pikir soraşmasy görkezdi diýip, Interfax.ru habar berýär.
Pikir soraşma 1-nji sentýabrdan 6-njy sentýabr aralygynda 8,28 müň amerikalynyň arasynda geçirildi. Olardan kädi, süýji, aksessuar, egin-eşik, otkrytka we tematiki oturylyşyklar üçin göz öňünde tutulýan çykdajylar barada soraldy.
2021-nji ýylda geçirilen pikir soraşma amerikalylaryň baýramçylyk üçin 10,1 mlrd dollar sarp etmegi meýilleşdirendiklerini görkezdi.
Hellowin baýramyny bellemäge geçen ýylky 65% we 2019-njy ýyldaky 68% bilen deňeşdirilende, sorag edilenleriň 69%-i gatnaşmagy meýilleşdirýär. Şol bir wagtyň özünde sarp edijiler baýramçylyga ortaça 100 dollar sarp etmekçi bolýar, bu bolsa rekord bolan geçen ýylky 103 dollardan pesdir.
Soňky ýyllarda Hellowine taýýarlyk has ir başlaýar: geçen ýylky 45%-e garanyňda, sorag edilenleriň 47%-i satyn alyşlary sentýabr aýynda başlamagy meýilleşdiripdir.
Pikir soraşmanyň netijelerine görä, çagalar we ulular üçin egin-eşik çykdajysy soňky bäş ýylda iň ýokary derejä – 2,9 mlrd dollara, haýwanlar üçin 710 mln dollara ýeter.
Bu ýyl çagalar üçin amerikalylar, esasan, Möý adamynyň, şa gyzynyň, jadygöýleriň we arwahlaryň keşbini saýlaýarlar. Uly adamlar jadygöýleriň, wampirleriň, arwahlaryň we deňiz galtamanynyň egin-eşiklerini has ýakyn görýärler. Ähli ýaşdakylar üçin meşhurlygy boýunça bäşinji orunda Betmen ýerleşýär.
