Müsüriň prezidenti Abdel Fattah as-Sisi Müsür Arap Respublikasyny 2036-njy ýyldaky tomusky Olimpiýa oýunlaryny geçirmek üçin dalaşgär hökmünde görkezmek teklibini makullady. Bu barada Müsüriň Ýaşlar we sport ministri Aşraf Sobhi habar berdi, onuň teswirlerini "Ahbar al-Ýaum" habarlar portaly getirýär diýip, TASS belleýär.
"Döwlet baştutany Müsüre 2036-njy ýylda Olimpiadany geçirmek hukugyny bermek baradaky resmi arza razylyk berdi" - diýip, Sobhi belledi.
Bu beýanat Halkara Olimpiýa Komitetiniň prezidenti Tomas Bahyň Kaire sapary mynasybetli guralan resmi kabul edişligiň dowamynda aýdyldy.
Bah hem öz gezeginde "Müsüriň sport infrastrukturasynyň 2036-njy ýyldaky Olimpiýa oýunlaryny geçirmäge mümkinçilik berýändigini" belledi.
Öň, tomusky Olimpiada Afrikada geçirilmändi. Kair 2008-nji ýyldaky Olimpiýa oýunlaryny geçirmäge hukuk almak göreşine gatnaşdy, emma finalçy şäherleriň sanawyna goşulyp bilmedi. Oýunlaryň paýtagty hökmünde bolsa Pekin saýlanypdy.
