Ikinji çärýekde dakylýan elektron gurluşlaryň global üpjünçiligi geçen ýylyň degişli döwri bilen deňeşdirilende, 6,9% peselip, 107,4 mln birlik boldy. Bu barada International Data Corporation (IDC) gözleg kompaniýasynyň hasabatynda habar berilýär diýip, interfax.ru belleýär.
“Dakylýan gurluşlara bolan isleg inflýasiýanyň ýokarlanmagy, çökgünlikden ätiýaç edilmegi, tehnologiki däl harytlaryň beýleki kategoriýalary üçin çykdajylaryň ýokarlanmagy, şeýle-de soňky iki ýylda dakylýan gurluşlaryň bazarynda görülýän örän çalt ösüş sebäpli peseldi” – diýip, IDC-niň analitikleri belleýär.
Global bazaryň lider bäşligi üýtgewsiz galdy: oňa Apple, Samsung, Xiaomi, Huawei we Imagine Marketing girýär, bu bäş kompaniýanyň dördüsi bolsa ikinji çärýekde satuwyň ýyllyk aňlatmasynda pese gaçyşyny hasaba aldylar.
“Apple, Samsung we Google ýaly kompaniýalar gymmat harytlara bolan islegiň şübheli görünýän döwründe premial “akylly” sagatlary çykarmagy dowam etdirýärler. Käbir täze önümleriň bahalary öňki nesilleriň bahalary ýaly bolsa-da, ABŞ-nyň dollarynyň ýokarlanmagy olaryň ýerli walýutalarda gymmatlamagyna getirdi” – diýip, IDC-niň gözlegler boýunça menejeri Jiteş Ubrani belledi.
IDC-niň täze çaklamasyna görä, 2022-nji ýylyň jemi boýunça dünýäde dakylýan gurluşlaryň satuwy üýtgemez we 535,5 mln birlik bolar. Şol bir wagtyň özünde, analitikler 2023-nji ýylda bazaryň ösüşiniň gaýtadan dikelmegine garaşýarlar.
