Katarda geçjek dünýä çempionaty mahalynda janköýerleriň arasynda ýörite futbol turniri guralar diýip, dünýä birinjiliginiň guramaçylyk komitetiniň kommunikasiýalar we HBS boýunça ýerine ýetiriji direktory Fatyma al-Nuaými žurnalistlere habar berdi.
«Janköýerler Ýakyn Gündogarda we arap dünýäsinde futbol boýunça dünýä çempionatynyň üstünlikli geçmeginde möhüm orun tutarlar. Biz janköýerleriň arasynda futbol turnirini geçirýändimize şat. Bu gaty gyzykly bolar we ajaýyp oýna umumy gyzyklanma dünýäniň çar künjüniň adamlaryny birleşdirer» — diýip, al-Nuaými belleýär.
Onuň sözlerine görä, kubok 29-njy noýabrdan 2-nji dekabr aralygynda Kataryň paýtagtynyň merkezindäki «Al-Bidda» seýilgähinde geçjek janköýerleriň festiwalynda ähli 32 agza-ýurduň futbol söýüjileriniň arasynda oýnalar.
Mini-turnir hem dünýä çempionatynyňky ýaly formatda geçer. Oýunçylaryň ýaşy 18-den kiçi bolmaly däl we olar haýsy ýurduň ýygyndysyna wekillik etjek bolsa, ýa-ha şol ýurduň raýaty bolmaly, ýa-da rezidenti.
Katar arap dünýäsinde futbol boýunça dünýä çempionatyny geçirmäge hukuk alan ilkinji döwlet boldy. Ol 20-nji noýabrdan 18-nji dekabr aralygynda geçer.
