10-njy sentýabrda Serdar Berdimuhamedow Ahal welaýatynyň täze, döwrebap edara ediş merkeziniň çäginde gurulýan Ahal welaýat Çagalar sagaldyş-dikeldiş merkeziniň binasyna baryp gördi.
Bu ýerde Komitetiň başlygy D.Orazow merkeziň gurluşygy, onuň bölümleriniň ýerleşdiriliş aýratynlyklary hem-de her bölümiň ähmiýetine görä, otaglaryň bezegleriniň aýratynlyklary barada hasabat berdi.
Şeýle hem döwlet Baştutany Ahal welaýat Çagalar sagaldyş-dikeldiş merkezine degişli çagalaryň saglyklaryny dikeltmekleri üçin niýetlenen binasyna baryp, bu ýerde ýerine ýetirilen işleriň derejesi bilen tanyşdy.
Bu ýerde hem Ahal welaýatynyň merkeziniň gurluşygy boýunça döwlet komitetiniň başlygy D.Orazow Çagalar sagaldyş-dikeldiş merkezine degişli binanyň otaglaryny enjamlaşdyrmak, olarda çagalaryň ýaş aýratynlyklary nazara alyp, degişli bezeg işlerini ýerine ýetirmek boýunça meýilleşdirilen işler barada hasabat berdi. D.Orazow merkeziň çäklerinde gurulýan durmuş maksatly binalaryň enjamlaşdyrylyşyna hormatly Arkadagymyzyň aýratyn üns berýändigini we bu desgalaryň Gahryman Arkadagymyzyň öwüt-ündewleri esasynda enjamlaşdyrylýandygyny habar berdi.
Serdar Berdimuhamedow ýurdumyzda çagalaryň sazlaşykly ösüşi, olaryň döwrebap bilim-terbiýe almaklary bilen baglanyşykly meseleleriň döwlet syýasatynyň möhüm ugurlaryna öwrülendigini we bu ugurda kesgitlenen wezipeleriň üstünlikli ýerine ýetirilmelidigini belledi hem-de komitetiň Başlygy D.Orazowa we Ahal welaýatynyň täze, döwrebap edara ediş merkeziniň şäheriniň häkimi Ş.Durdylyýewe birnäçe tabşyryklary berdi.
