G.Baýjanow, başga işe geçmegi sebäpli, Suw hojalygy baradaky döwlet komitetiniň başlygy wezipesinden boşadyldy. Bu baradaky degişli Permana 9-njy sentýabrda Prezident Serdar Berdimuhamedow gol çekdi.
Şeýle-de resminama bilen, D.Genjiýew Suw hojalygy baradaky döwlet komitetiniň başlygy wezipesine bellenildi.
Hökümetiň 9-njy sentýabrda geçirilen mejlisinde döwlet Baştutany täze bellenen ýolbaşça ýüzlenip, ýurdumyzda goşmaça suw gorlaryny döretmek üçin howdanlaryň göwrümini giňeltmek boýunça zerur işleriň geçirilmelidigini we suw sorujylaryň talabalaýyk işledilmegini gazanmalydygyny belledi. Nygtalyşy ýaly, ýerleriň melioratiw ýagdaýyny gowulandyryp, şor suw akabalaryny wagtynda we talabalaýyk arassalap durmak, suwaryş akabalarynda suw ölçeýji enjamlary, ekerançylyk meýdanlarynda suw tygşytlaýjy gurallary gurnamak boýunça teklipleri taýýarlamak wajypdyr.
