Milli Statistika býurosy tarapyndan gysgaça netijesi hödürlenen Gazagystanyň ilat ýazuwyna görä, ilat sany çak edilişinden 400 müň adam köp boldy. Ýagny, 1-nji awgusta çenli ýagdaýa görä, Gazagystanda 19 644 müň adam ýaşaýar diýip, býuro habar berýär. Muny centralasia.media ýetirýär.
Täze maglumatlarda iýun aýynda döredilen sebitleriň ilat sany ilkinji gezek görkezilýär.
Sebitleriň köpüsinde ilat ýazuwy statistikada göz öňünde tutulandan köp ýaşaýjyny hasaba aldy. Iň uly ösüş million ýaşaýjyly şäherlerde, günorta Türkestan, Žambyl we Almaty welaýatlarynda, şeýle-de Akmola welaýatynda hasaba alyndy.
Ilat ýazuwynyň netijelerine görä, Almaty Gazagystanyň iň uly sebiti hasaplanýar – megapolisde 2 135 müň adam ýaşaýar, onuň yzyndan Türkestan welaýaty gelýär – bu ýerde 2 105 müň adam ýaşaýar.
Statistika býurosynyň maglumatlaryna görä, ilkinji ýedi aýda ilat sany, esasan, paýtagtda köpeldi – bu ýerde ösüş 2,53%-e ýetdi, Almatyda we Mangistau welaýatynda – 1,61%, Şymkentde – 1,44%, Almaty welaýatynda – 0,94% boldy.
2022-nji ýylyň ilkinji ýedi aýynda Gazagystanyň 20 sebitiniň 14-üsinde ilatyň köpelişi hasaba alyndy. 20 sebitiň 16-synda migrasiýa akymy hasaba alynýar. Ilatyň migrasion köpelişi diňe Mangistau sebitinde, Şymkentde, Almatyda we paýtagtda bellenildi.
Umuman, ýanwar – iýul aýlarynda Gazagystanda migrasiýanyň saldosy ýene-de otrisatel boldy. Ilat ýazuwynyň netijelerine görä, Gazagystanyň şäher ilaty 61,7%-e ýetdi, ýurduň oba ilaty 38,3%-e barabar.
