Bütindünýä Saglygy goraýyş guramasy (BSGG) Ebola wirusy bilen ýüze çykan keseli bejermek üçin iki sany täze serişdäni ulanylyş üçin maslahat berdi. Onuň metbugat relizinde bellenilişi ýaly, gürrüň monoklonal antibedenjiklerine esaslanýan mAb114 (Ansuvimab, Ebanga) we REGN-EB3 (Inmazeb) dermanlary barada gidýär diýip, TASS habar berýär.
“Dermanlaryň randomizirlenen kliniki synaglaryna yzygiderli gözegçiligiň we metaanaliziň esasynda BSGG bu serişdeleri Ebola keselinde ulanmak maslahaty bilen çykyş etdi”. Ženewadaky brifingde BSGG-niň kliniki kömek bölüminiň ýolbaşçysy Janet Diaz “Ansuvimab” we “Inmazeb” serişdeleriniň hassalaryň ölüm derejesini 60% azaldýandygyny aýtdy. Bu dermanlar Afrikadaky Ebola ýaýrawy wagtynda synagdan geçirildi. Aýratynam, iň uly barlag Kongo Demokratik Respublikasynda (KDR) geçirildi.
BSGG Ebolany bejermek boýunça gollanmada ZMapp we Remdesivir serişdelerini bu kesele garşy derman hökmünde ulanmaly däldigini habar berdi.
Ebola wirusy ýabany haýwanlardan geçip, soňra adamlaryň arasynda ýaýraýar. Bu keseliň ilkinji alamatlary gyzzyrma, myşsa agyrylary, kellagyry we bokurdagyň agyrmagydyr. Soňra böwrekleriň we bagryň işiniň bozulmagy, käbir ýagdaýlarda bolsa içki we daşky gan akma ýüze çykýar. Adamyň Ebola wirusy bilen kesellemeginiň ilkinji hadysasy 1976-njy ýylda häzirki KDR-iň çäginde hasaba alyndy. Kesellänleriň sany boýunça iň uly ýaýraw 2014 – 2016-njy ýyllarda Günbatar Afrikada Gwineýanyň, Liberiýanyň we Sýerra-Leoneniň çäginde boldy. Onuň pidalarynyň sany 11 müňden geçdi.
