Ýaponiýanyň Honda Motor Co. kompaniýasy çykdajylaryň ýokarlanmagy we awtomobil satuwynyň peselmegi netijesinde 2023-nji maliýe ýylynyň birinji çärýeginde arassa girdejisiniň ep-esli azalandygyny hasaba aldy. Bu barada interfax.ru belleýär.
Kompaniýanyň 2022-nji ýylyň aprel – iýun aýlarynda arassa girdejisi bir ýyl ozalky 222,5 mlrd ýena garşy 149,22 mlrd ýena ($1,1 mlrd) boldy. Analitikler görkezijiniň 172,76 mlrd ýena çenli azalmagyna garaşypdylar.
Geçen çärýek girdeji ulaglaryň we motosiklleriň bahasynyň ýokarlanmagy netijesinde ýyllyk aňlatmasynda 6,9% ýokarlanyp, 3,83 trln ýena ýetdi. Geçen çärýek Honda-nyň awtomobil bölümçesiniň operasion girdejisi tas iki esse, bir ýyl ozalky 70,6 mlrd ýenadan 38,26 mlrd ýena çenli azaldy. Motosikller bölümçesiniň operasion girdejisi 21,2%, 97,8 mlrd ýena çenli ýokarlandy.
Aprel – iýun aýlarynda ulaglaryň satuwy bir ýyl ozalky 998 müňden 815 müňe çenli azaldy, motosiklleriň satuwy bolsa 3,88 milliondan 4,25 milliona çenli ýokarlandy.
Honda indiki mart aýynda tamamlanýan häzirki maliýe ýyly üçin girdeji çaklamasyny ýokarlandyrdy we indi görkezijiniň 15% ösüp, 16,75 trln ýena ýetmegine garaşýar. Ýyllyk girdejiniň 710 mlrd ýena, awtomobil satuwynyň 4,2 mln, motosikl satuwynyň 18,6 mln derejesinde bolmagyna garaşylýar.
2022-nji ýylyň başyndan bäri Honda-nyň kapitallaşdyrmasy 6,1% ýokarlandy we häzir, takmynan, 5,85 trln ýena barabar.
