OPEK+ ýurtlary 2022-nji ýylyň iýul aýynda nebit önümçiligini günde 570 müň barrel (b/g) artdyrdylar, şeýle-de bolsa önümçilik boýunça meýilnama görkezijilerinden 2,74 mln b/g yza galýarlar. Bu Halkara energetika agentliginiň (HEA) awgust hasabatyndan gelip çykýar diýip, TASS habar berýär.
Birleşigiň agzalarynyň nebit önümçiliginiň göwrümi iýun aýy bilen deňeşdirilende 570 müň b/g, ýagny günde 38,14 mln barrelden günde 38,71 mln barrele çenli artdy. Şol bir wagtyň özünde OPEK+ ýurtlary tarapyndan önümçiligiň maksatly derejesi iýun aýy üçin 41,45 mln b/g barabardy. Şeýlelik bilen, meýilnamadan yza galyş günde 2,74 mln barrel derejesinde boldy.
OPEK+ ýurtlary bazary durnuklaşdyrmak üçin 2020-nji ýylyň maý aýyndan bäri nebit önümçiligini azaldýarlar, ýöne bu meýilnamanyň durmuşa geçirilmegi esasynda eýýäm ony dikeldýärler. Şeýlelikde, 2021-nji ýylyň awgust aýyndan bäri olar nebit önümçiligini aýda, takmynan, 400 müň b/g derejesinde ýokarlandyrmak tertibini berjaý etdiler. Meýilnama 2022-nji ýylyň iýul we awgust aýlary üçin üýtgedildi – koronawirus pandemiýasyndan soň dünýä ykdysadyýetiniň dikeldilmegi sebäpli nebite bolan islegiň tomsuna ýokarlanmagynyň esasynda birleşigiň ýurtlary önümçiligiň ösüşini 648 müň b/g çenli ýokarlandyryp, sentýabr kwotasyny deň paýladylar. Şeýle-de bolsa, erkin mümkinçilikleriň ýoklugy sebäpli birleşigiň agzalary maksatly derejä hemişe ýetip bilmeýärler. Şeýlelikde, nebit önümçiligini azaltmak boýunça OPEK+ şertnamasy iýul aýynda artygy bilen ýerine ýetirildi – şertnamanyň ýerine ýetiriliş derejesi bir aý öňki 314%-e garşy 523% boldy.
