Britaniýanyň lýuks awtomobil öndürijisi McLaren ilkinji gezek krossowka çykaryp başlaýandygyny habar berdi. Şeýlelikde, kompaniýa moda we köçe eşikleri ugrundaky hyzmatdaşlyk arkaly has köp alyjyny özüne çekmegi maksat edinýär. Bu barada BoF ýazýar diýip, gazeta.ru belleýär.
Awtoöndüriji Athletic Propulsion Labs aýakgap kompaniýasy bilen bilelikde krossowkalary öndürdi. HySpeed ady bilen çäkli hatar bäş reňkdäki modelleri öz içine alýar. Bu krossowkalaryň dizaýnynda uglerod süýüminden oturgyçlar we plastina ýaly McLaren superkarlarynyň elementleri ulanyldy.
Taslamanyň ýolbaşçylarynyň aýtmagyna görä, krossowkalaryň dizaýnyny taýýarlamak we önümçiligi ýola goýmak işleri iki ýyla golaý wagt aldy. Aýakgabyň bahasy jübüt üçin 450 dollar bolar.
Öň, britan awtoöndürijisi egin-eşik kolleksiýasyny döretmek üçin Belstaff we Rhude moda brendleri bilen hyzmatdaşlyk edipdi, SunGod markasy bilen bilelikde bolsa äýnek öndürdi.
“Bilelikdäki ygtyýarnama gatnaşyklary – bu biziň ýykgyn edýän zadymyz, goý, ol Günden goraýjy äýnek, krossowka ýa-da köçe eşigi bolsun, tapawudy ýok” – diýip, McLaren-iň baş marketing müdiri Garet Dansmor aýtdy. Onuň bellemegine görä, olar “medeni taýdan aktual bolmaga çalyşýarlar”.
