«Bawariýanyň» polşaly hüjümçisi Robert Lewandowski ýakyn günlerde «Barselona» bilen şertnama gol çekişer. Transferiň ähli ownuk meseleleri klublaryň arasynda ahyry ylalaşyldy diýip, belli insaýder Fabrisio Romano habar berýär.
Lewandowskiniň "Barselona" bilen ylalaşygy 2025-nji ýyla çenli göz öňüne tutulandyr, transfer hakynda öňümizdäki dynç günleri resmi taýdan mälim ediler diýip garaşylýar. "Bawariýa" bu geçiş üçin 50 mln ýewro alar.
Möwsüm gutarandan bäri geçen döwrüň içinde Lewandowski "Çelsi" hem-de "PSŽ" bilen gepleşikleri geçirmekden üzül-kesil ýüz öwürdi, karýerasyny dowam etmek üçin diňe "Barselonany" saýlap, öz diýeninde berk durdy.
Geçen möwsümde Lewandowski ähli turnirlerde "Bawariýanyň" düzüminde 46 oýunda çykyş etdi, 50 gol geçirdi (Bundesligada 35, Çempionlar ligasynda 13, Germaniýanyň Superkubogynda 2) we 7 gezek netijeli pas berdi.
