“Grammy” amerikan aýdym-saz baýragynyň gowşurylyş dabarasy 2023-nji ýylyň 5-nji fewralynda Kaliforniýa ştatynyň Los-Anjeles şäherinde geçiriler. Bu barada baýragy gowşuryjy Milli sungat we grammofon ýazgysy tehnikasynyň akademiýasynyň saýtynda habar berilýär. Muny TASS ýetirýär.
91 kategoriýada laureatlary yglan etjek dabara indiki ýyl 65-nji gezek geçiriler. Ol 5-nji fewralda Crypto.com Arena meýdançasynda (2021-nji ýyla çenli Staples Center hökmünde belli) geçiriler.
Abraýly baýrak üçin nominantlar şu ýylyň 15-nji noýabrynda yglan ediler. Ses berişlik 2023-nji ýylyň 4-nji ýanwaryna çenli dowam eder. Bu baýraga 2021-nji ýylyň 1-nji oktýabryndan 2022-nji ýylyň 30-njy sentýabry aralygynda çykarylan aýdym-saz eserleri dalaş edip bilýär.
1957-nji ýylda ABŞ-da Milli sungat we grammofon ýazgysy tehnikasynyň akademiýasy esaslandyryldy. Bu gurama 1958-nji ýylda “Grammy” adyny alan baýragy (“grammofon” sözünden, ýeňijilere hut şonuň şekilinde heýkeljik gowşurylýar) döretdi.
“Grammy-nyň” ilkinji gowşurylyş dabarasy 1959-njy ýylyň 4-nji maýynda boldy. Ol iki şäherde parallel geçirildi: Los-Anjelesde we Nýu-Ýorkda. Baýraklar geçen ýylyň aýdym-saz üstünlikleri üçin 20-den gowrak nominasiýada berildi.
