Birinji çärýekde dünýäde smartfon üpjünçiligi geçen ýylyň degişli döwri bilen deňeşdirilende 11% azaldy. Muny Canalys analitik kompaniýasynyň deslapky maglumatlary delillendirýär. Bu COVID-19 pandemiýasy başlany bäri iň ýaramaz pese gaçyş bolup, ol oňyn däl ykdysady şertler we möwsümleýin islegiň gowşaklygy bilen baglanyşyklydyr diýlip, habarda aýdylýar.
“Bazarlarda “omikron” ştammy sebäpli COVID-19 bilen keselleme hadysalary hem köpelýär” – diýip, Canalys-yň wise-prezidenti Nikol Pen belleýär.
Onuň aýtmagyna görä, üpjün edijiler rus-ukrain dawasy, Hytaýda dowam edýän lokdaunlar, şeýle-de inflýasiýanyň ýokarlanmak howpy sebäpli düýpli näbellilikler bilen ýüzbe-ýüz bolýar. “Bularyň ählisi pes möwsümleýin islege goşuldy” – diýip, Pen belleýär.
Günorta Koreýanyň Samsung Electronics kompaniýasy ýanwar – mart aýlarynda smartfon satuwy boýunça dünýäde birinji orny eýeledi. Onuň bazardaky paýy geçen ýylyň degişli döwründäki 22% we 2021-nji ýylyň dördünji çärýegindäki 19% bilen deňeşdirilende 24% boldy.
Apple Inc. amerikan kompaniýasy iPhone 13-e islegiň ýokary bolmagy sebäpli özüniň bazar paýyny bir ýyl ozalky 15%-den 18%-e çenli artdyrdy.
Hytaýyň Xiaomi kompaniýasy 13% paý bilen üçünji orunda galdy. Onuň paýy 2021-nji ýylyň birinji çärýegindäki görkezijiden (14%) pes boldy. Dördünji we bäşinji orunlary Oppo (şol sanda OnePlus) we Vivo eýeledi. Olaryň global bazardaky paýlary, degişlilikde 11%-den 10%-e we 10%-den 8%-e çenli azaldy.
