Virgin Galactic kompaniýasy 16-njy fewraldan suborbital uçuşlara petek satyp başlady. Kompaniýa şu ýylyň ahyryna çenli kosmosa syýahatçylary iberip başlamagy meýilleşdirýär. Birinji tapgyrda orbita müň adamyň iberilmegine, soňra masştabyň giňeldilmegine garaşylýar. Uçuşlar Nýu-Meksikodan amala aşyrylar we her uçuşyň dowamlylygy 90 minut bolar.
Petek 150 müň dollar möçberinde depoziti goşmak bilen birlikde 450 müň dollara düşer. Şeýlelik bilen, kompaniýa petek satuwyndan, takmynan, 450 mln dollar girdeji gazanyp biler. Virgin Galactic-iň ýolbaşçylygy gazanylan üstünliklere oňyn baha berýär. “Biz işimiziň ösüşini goldamak üçin özüne çekiji we netijeli satuw modelini işläp taýýarladyk” – diýip, kompaniýanyň täjirçilik we sarp ediş amallary boýunça prezident we müdir wezipelerini eýeleýän Bler Riç belledi.
Sişenbe güni geçirilen deslapky söwdalaryň dowamynda kompaniýanyň paýnamalary 12%, ýagny bir kagyz üçin 8,1 dollara çenli gymmatlady.
2021-nji ýylyň iýun aýynda, kompaniýany esaslandyryjy Riçard Brensonyň kosmosa uçmazyndan öň Virgin Galactic-iň paýnamalary rekordly 57,51 dollara ýetdi. Şondan bäri paýnamalar, takmynan, 86% arzanlady.
