Ýewropanyň kosmos agentliginiň hünärmenleri uky režiminiň Gyzyl planeta uçýan kosmonawtlar üçin iň gowy çözgüt boljakdygyny nygtaýarlar. Bu barada makala Neuroscience & Biobehavioral Reviews žurnalynda neşir edildi.
Mysal üçin, haçan-da aýylar uka gidenlerinde olar öz myşsalarynyň we süňkleriniň horlanmagynyň öňüni alyp, az serişdeleri peýdalanýarlar. Uky režimi kosmonawtlaryň agramsyzlyk ýagdaýynda bolup, öz myşsalaryny az ulanmaklary netijesinde bolup geçýän horlanmany saklamaga kömek eder.
Şeýle-de, ukuda bolan gözlegçilere ýaşaýyş üçin az iýmit we suw gerek bolar, bu hem ýeri we ýangyç çykdajylaryny tygşytlar. Aýratynam, Marsa uçmak üçin, takmynan, iki ýyllyk iýmit we suw ätiýajy gerek bolýar. Gibernasiýa ýagdaýynda ekipažyň metabolizm tizligi kadaly ýagdaýdan 25%-e çenli peselýär, bu hem zerur bolan azyk üpjünçiligini düýpgöter azaldýar.
“Adamyň gibernasiýasy ylmy fantastikanyň çäginden çykýar we kosmos syýahatlary üçin rewolýusion usul bolup biler” – diýip, ÝKA täze hasabatynda belleýär. Gürrüň üç aýdan dokuz aýa çenli dowam edýän uky barada gidýär.
Uky wagtynda ekipažyň agzalary ýatylýan kapsulalarda bolarlar. Olar bedeniň ýagdaýyna, temperatura we ýüregiň ýygrylma ýygylygyna gözegçilik etmek üçin dakylýan datçiklere berkidiler.
Ýumşak daşly konteýnerler pes ýagtylyk we ýokary çyglylyk bolan gurşawda ýerleşer. ÝKA-nyň maglumatlaryna görä, kosmonawtlar gyzmaýan we bedeniň rahat ýagdaýyny üpjün edýän eşikleri geýerler.
