Hindistan kriptowalýutalardan we beýleki sanly aktiwlerden gelýän girdejilere 30% möçberinde salgyt salar. Bu barada Hindistanyň maliýe ministri Nirmala Sitharamanyň beýanyna salgylanyp, Reuters agentligi habar berýär. Muny epravda.com.ua ýetirýär.
Agentligiň belleýşi ýaly, bu ädim bilen kriptowalýutalardan we NFT-den gelýän girdejiler Hindistanda salgyt salmagyň iň ýokary diapazonyna degişlidir. Hindistanda umumy göwrümi, takmynan, 400 mlrd rupiýa (5,37 mlrd dollar) kriptowalýuta aktiwleri bolan 15-den 20 milliona çenli kriptomaýadarlary bar. Hindi kriptobazarynyň göwrümi barada resmi maglumatlar ýok.
Bellenilişi ýaly, Hindistanda sanly walýutalaryň tarapdarlary üýtgeşmelere oňyn garaýarlar we resmi salgyt bazasynyň döredilmeginiň kriptobazary kanunylaşdyrjakdygyna umyt bildirýärler.
“Wirtual sanly aktiwlerden gelýän girdejilere 30 göterim möçberindäki salgyt, ýokary bolsa-da, oňyn ädim hasaplanýar, sebäbi ol kriptowalýutany kanunylaşdyrýar we kriptowalýutanyň hem-de NFT-niň mundan beýläk hem kabul edilmegi bilen baglylykda optimistik ýagdaýy görkezýär” – diýip, ZebPay kriptowalýuta biržasynyň ýerine ýetiriji müdiri Awinş Şekhar aýtdy.
