Türkmen gelip çykyşly eýranly futbolçy, Sankt-Peterburgyň «Zenit» klubynyň hüjümçisi Serdar Azmun tomusda çykyş edýän klubyny üýtgeder. Ol Lewerkuzeniň «Baýeri» bilen şertnama baglanyşar. Şertnama 2027-nji ýyla çenli niýetlenilýär. Bu barada Bundesliganyň kluby resmi saýtynda yglan etdi.
Hüjümçi nemes klubyna erkin agent görnüşinde geçer.
27 ýaşly Azmun 2019-njy ýylyň fewralyndan bäri çykyş edip gelýän kluby bilen şertnamasynyň möhletini uzaltmazlyk kararyna geldi.
«Azmun — dürli pozisiýalarda ulanyp boljak uniwersal hüjümçi. Ol ýyndam, kelle bilen oňat oýnaýar, töweregini oňat duýýar» - diýip, «Baýeriň» sport direktory Rusi Föller transferi teswirläp belledi.
«Ol diňe bir gol geçirmek bilen çäklenmän, hüjümi gurnamaga hem işjeň gatnaşýar. Utgaşykly futbola gatnaşýan futbolçy hökmünde ol «Baýer» üçin tüýs ýerine düşen oýunçy» - diýip Föller belledi.
Azmunyň özi Germaniýanyň çempionatynda çykyş etmekden aýratyn tolgunmany başdan geçirýändigini belledi.
Russiýada Azmun «Rubin», «Rostow» we «Zenit» klublarynda çykyş etdi. Ol türkmen tälimçisi Gurban Berdiýewiň iň gowy şägirtleriniň biri.
Eýranyň milli ýygyndysynyň düzüminde ol 60 oýunda 39 gol geçirdi. Gollarynyň sany boýunça ol milli ýygyndysynyň taryhynda üçünji orny eýeleýär.
