10-njy ýanwarda Prezident Gurbanguly Berdimuhamedow Ministrler Kabinetiniň Başlygynyň käbir orunbasarlarynyň hem-de Aşgabat şäheriniň we welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Onda obasenagat toplumyna gözegçilik edýän wise-premýer hem-de häkimler şu günlerde alyp barýan işleri barada hasabat berdiler.
Iş maslahatynyň dowamynda welaýatlaryň häkimleri şu günlerde alnyp barylýan işler, möwsümleýin oba hojalyk işleriniň depginleri, gowaçadan boşan ýerlerde ýeralma we gök-bakja ekinlerini ösdürip ýetişdirmek boýunça görülýän çäreler barada gezekli-gezegine hasabat berdiler.
Prezident Gurbanguly Berdimuhamedow hasabatlary diňläp, daşary ýurtlardan getirilýän önümleri özümizde öndürmek babatdaky meseläni hemişelik üns merkezinde saklamalydygyny belledi. Şeýle-de türkmen Lideri gök-bakja ekinlerini ekmek üçin niýetlenen ýerleriň şu ýyl 50 müň 450 gektar artdyrylyp, onuň jemi 106 müň gektara ýetirilmegiň meýilleşdirilýändigini nygtap, munuň ýurtda azyk bolçulygyny pugtalandyrmaga ýardam etjekdigine ünsi çekdi.
