Amerikan häkimiýetleri ABŞ-nyň taryhynda ilat sanynyň köpelişiniň iň pes depginini hasaba aldylar, migrasiýa köpelişi bolsa ilkinji gezek tebigy köpelişden ýokary boldy. Bu barada ABŞ-nyň hökümetiniň Ilat ýazuwy býurosynyň hasabatynda aýdylýar diýip, TASS habar berýär.
Onuň hasaplamalaryna görä, ýurduň ýaşaýjylarynyň sany senenama ýylynda, takmynan, 392 665 san ýa-da 0,1% artdy (2020-nji ýylyň 1-nji iýulyndan 2021-nji ýylyň 1-nji iýuly aralygynda). “Haýal ösüş depginini arassa halkara migrasiýasynyň peselmegi, çaga dogluşynyň azalmagy we COVID-19 pandemiýasy sebäpli ölüm derejesiniň ýokarlanmagy bilen düşündirip bolar” – diýip, býuro belleýär.
Döwlet guramasynda ilatyň köpelişiniň 148 043 adama ýeten tebigy köpelişiň (doglanlaryň sanynyň aradan çykanlaryň sanyndan köp bolmagy) we 244 622 adama barabar bolan arassa halkara migrasiýasynyň hasabyna bolandygy bilen düşündirilýär. Býuro ilatyň migrasiýa köpelişiniň ilkinji gezek tebigy köpelişden ýokary bolandygyny hem belleýär.
“2020-nji ýyldan 2021-nji ýyl aralygynda 33 ştatda ilatyň köpelişi hasaba alyndy, 17 ştatda we Kolumbiýa okrugynda ilat azaldy, olaryň 11-sinde azalma 10 müňden gowrak adama barabar boldy. Bu bir ýylda ilatyny ýitiren ştatlaryň sanynyň örän köp bolmagydyr” – diýlip, hasabatda bellenilýär. Şol bir wagtyň özünde býuro Tehasda ilatyň hasam köpelendigini habar berýär.
Häzirki wagtda ABŞ-da, takmynan, 332 mln adam ýaşaýar.
