Bloomberg agentligi öz saýtynda 2021-nji ýylda dürli iş ugurlarynda hyzmatlary ykrar edilmäge mynasyp bolan 50 adamyň, şeýle-de dünýä täsirini ýetiren hadysalaryň sanawyny neşir etdi. Bu barada TASS habar berýär.
Agentlik tarapyndan düzülen reýtinge işewürlik, güýmenje, maliýe, syýasat, ylym we tehnologiýa dünýäsiniň wekilleri girdi. Şeýlelikde, “işewürlik” kategoriýasyna beýlekiler bilen bir hatarda Ford kompaniýasynyň ýolbaşçysy Jim Farli, Discovery teleýaýlymynyň prezidenti we ýerine ýetiriji müdiri Dewid Zaslaw hem-de Pfizer-iň baş direktory Albert Burla goşuldy.
“Maliýe” kategoriýasyna Amazon korporasiýasynyň ýolbaşçysy Jeff Bezosyň aýrylyşandan soň dünýäniň iň baý adamlarynyň birine öwrülen öňki aýaly Makkenzi Skott girdi. Bu ýerde Meme Stock ýa-da mem-aksiýalary atly hadysa hem ýerleşdi. Bu kompaniýanyň gowy işiniň netijesinde däl-de, sosial ulgamlarda we forumlarda ýüze çykan galmagal sebäpli ýokarlanan aksiýalardyr.
Agentlik “syýasat” bölüminde russiýaly bloger Alekseý Nawalnyýny we 2020-nji ýylyň ahyrynda tussag edilen Gonkongyň oppozision magnaty Jimmi Laýy ýerleşdirdi.
NASA Ingeniuity taslamasynyň ylmy ýolbaşçysy, ilkinji Mars dikuçaryny dörediji Mimi Ong “ylym we tehnologiýa” rubrikasyna goşuldy. Onda 28-nji oktýabrdan Meta diýlip atlandyrylan Facebook amerikan korporasiýasynyň öňki işgäri, kompaniýanyň işi barada köpçülige maglumat berýän Frensis Haugen hem görkezildi. “Güýmenje” kategoriýasyna doly sanly eseri Londondaky auksionda 69,3 mln dollara satylan amerikaly suratkeş Maýk Winkelmann girdi. Bu bölümde amerikaly aýdymçy Britni Spirs hem ýerleşdi.
Şeýle-de, agentlik dürli ýyllarda eýýäm sanawa giren, şonuň üçin “top-50-ä” gaýtadan girip bilmeýän adamlary goşmaça belledi. Olaryň arasynda 30-njy noýabrda Forbes-iň wirtual şöhrat zalyna giren, Ethereum kriptowalýutasyny dörediji Witalik Buterin bar.
