Günorta polýusyň üstündäki ozon deşigi soňky bir hepdäniň dowamynda Antarktidanyň ululygyndan geçdi. Muny Copernicus atmosfera monitoring gullugynyň hünärmenleri kesgitlediler we bu barada “The Guardian” neşirine gürrüň berdiler diýip, gazeta.ru habar berýär.
Antarktikanyň üstündäki ozon gatlagy her ýyl awgust aýyndan oktýabr aýy aralygynda ýukalýar, deşik sentýabr aýynyň ortalaryndan oktýabr aýynyň ortalary aralygynda özüniň iň ýokary ululygyna ýetýär. Şu ýyl deşigiň göwrümi 1979-njy ýyldan bäri bu wagtda bolýan 75% ýagdaýlardan uly boldy. Munuň sebäbi heniz belli däl.
2020-nji ýylda oktýabr aýynyň başynda ozon deşigi 24 mln inedördül km çenli ulaldy, bu geçen ýyllara garanyňda uludyr. 2021-nji ýylda deşik şol bir göwrümde bolar diýlip çaklanylypdy, ýöne ol eýýäm bu ululykdan geçdi we häzirem ulalmagyny dowam edýär.
Ozon gatlagy planetany ultramelewşe şöhlelerinden goraýar. Hlorftoruglerod ýaly sintetik birleşmeleriň ulanylmagy geçen asyrda ozon deşiginiň emele gelmegine getirdi. Bu birleşmeler gadagan edilenden soň, ozon gatlagy kem-kemden dikelýär, ýöne bu örän haýal bolup geçýär.
