Hindistan kriptowalýuta ulanyjylarynyň sany boýunça dünýäde ikinji orny eýeleýär. Olaryň sany 15 milliondan gowrak diýip, Finder gözleg kompaniýasyna salgylanyp, “The Economic Times” gazeti habar berýär. Muny TASS ýetirýär.
Onuň maglumatlaryna görä, Hindistan kriptowalýuta ulanyjylarynyň sany boýunça diňe Wýetnamdan yza galýar. Ýurt Malaýziýa hem-de Filippinler bilen iň uly bitkoin paýy bolan bäş ýurduň hataryna girip, bu görkeziji boýunça Indoneziýa bilen ikinji orny paýlaşýar diýip, geçirilen pikir soraşmanyň netijesi boýunça Finder hünärmenleri belleýärler.
Gözleg 15 milliondan gowrak hindistanlynyň hususy kriptowalýuta holdinglerine maýa goýandygyny görkezýär. Ýurtda kriptowalýuta maýa goýumlary 2020-nji ýylyň aprel aýyndaky 923 mln dollardan 2021-nji ýylyň maý aýyna çenli tas 6,6 mlrd dollara çenli ýokarlandy. Ösüş 400% boldy.
Kriptowalýuta amallaryna Hindistanyň kiçi şäherleriniň ýaşaýjylary has işjeň gatnaşýarlar. Olaryň hasabyna CoinsSwitch Kuber programmasyny ulanyjylaryň sany 2020-nji ýylyň iýun aýyndan 2021-nji ýylyň iýun aýy aralygynda 2 000% ýokarlandy diýip, Finder habar berýär. Geljek bäş ýylda Hindistan blokçeýn tehnologiýasyny ornaşdyrmakda dünýä liderleriniň biri bolup biler, bu hem ýurduň ykdysadyýetine sanly formata geçmäge ýardam berer.
