Filippinli Menni Pakýao 66,68 kg çenli agram kategoriýasynda Bütindünýä boks assosiasiýasynyň (WBA) wersiýasy boýunça dünýäniň superçempiony titulyny yzyna alyp bilmedi. Las-Wegasda geçirilen 12 raundlyk söweşde ol emin agzalarynyň karary bilen titulyň eýesi kubaly Ýordenis Ugasdan ýeňildi (113-115, 113-115, 112-116).
Ilkibaşda Pakýao amerikaly Errol Spens bilen duşuşmalydy, ýöne ol lukmançylyk görkezmeleri boýunça söweşden aýryldy.
Pakýao üç ýeňişden ybarat tapgyryny tamamlady. 2018-nji ýylyň iýul aýynda filippinli türgen 7-nji raundda argentinaly Lukas Matisseni tehniki nokaut bilen ýeňip, WBA wersiýasy boýunça yzygiderli dünýä çempiony titulyna eýe boldy, 2019-njy ýylyň ýanwar aýynda utuk boýunça amerikaly Edrien Bronerden üstün çykyp, tituly gorady, 2019-njy ýylyň iýul aýynda bolsa emin agzalarynyň karary bilen amerikaly Kit Turmany ýeňip, dünýäniň superçempiony titulyny gazandy. Şu ýylyň ýanwar aýynda WBA-nyň ýolbaşçylygy karýerasyndaky uzak arakesme sebäpli, Pakýaony “rugsatdaky çempion” diýip belledi, onuň tituly bolsa Ugasa geçirildi. Pakýao 2019-njy ýylyň iýul aýyndan bäri ringe çykanokdy diýip, TASS belleýär.
Indi 42 ýaşly Pakýaonyň hasabynda 62 ýeňiş (39-sy nokaut bilen), sekiz ýeňliş we iki deňme-deňlik bar. Ol taryhda sekiz agram kategoriýasynda dünýä çempiony bolan ýeke-täk boksçydyr.
35 ýaşly Ugas 27-nji ýeňşini (12-si nokaut bilen) gazandy, onuň dört ýeňlişi bar. Ol 2020-nji ýylyň sentýabr aýynda amerikaly Abel Ramosy ýeňip, WBA wersiýasy boýunça yzygiderli dünýä çempiony titulyna eýe boldy. Höwesjeň ringde ol dünýä çempiony (2005) we Olimpiýa oýunlarynyň bürünç baýrakçysy (2008) boldy.
