Hytaý häkimiýetleri üçünji çaganyň dünýä inmegi üçin jerimeleri we beýleki sanksiýalary ýatyrdylar. HHR-iň Döwlet geňeşiniň kararyna görä, 2025-nji ýyla çenli hökümet dogluş derejesini ýokarlandyrmak boýunça sosial syýasatyň doly hukukly ulgamyny döreder. Bu barada TASS habar berýär.
“Sosial üpjünçilik üçin tölegleri we beýleki çäklendiriji çäreleri ýatyrmak kararyna gelindi. Sosial üpjünçilik üçin tölegler ýatyryldy, degişli jerimeler baradaky düzgünlere gaýtadan seredildi we ýatyryldy” – diýlip, resminamada görkezilýär.
Resminamada bellenilişi ýaly, geljekde hasaba alyş, bilim edaralaryna we işe ýerleşmek işleri raýatlaryň maşgala ýagdaýlaryny we olaryň çaga dogluşyny çäklendirmek syýasatyny bozup biljekdigini göz öňünde tutmaz.
Häkimiýetler çagalaryň dünýä inmegi, terbiýelenmegi we bilim almagy boýunça sosial goldaw çäreleriniň hem-de hyzmatlarynyň hilini we netijeliligini ýokarlandyrmak, şeýle-de ýaş maşgalalar üçin olaryň bahasyny peseltmek isleýär. 2035-nji ýyla çenli “ilatyň demografiýa gurluşyny gowulandyrmak” üçin ýurduň demografiýa syýasaty kämilleşdirilmeli.
Şu ýylyň 31-nji maýynda Hytaýyň Kommunistik partiýasynyň Merkezi komitetiniň syýasy býurosy maşgalalara üç sany çaga rugsat bermek kararyna geldi.
1970-nji ýyllaryň ortalaryndan bäri HHR-de çaga dogluşyny çäklendirmek boýunça berk syýasat alnyp barylýar. Käbir kadadan çykmalar bilen maşgalalara diňe bir çaga rugsat berilýärdi. 2016-njy ýylyň 1-nji ýanwaryndan HHR-de ähli hytaý maşgalalaryna iki çaga rugsat berýän kanun güýje girdi. 2020-nji ýylda ýurtda 10,035 mln täze doglan çaga hasaba alyndy, bu hem 1949-njy ýylda HHR-iň döredilen gününden bäri iň pes görkeziji boldy.
