Hökümetiň 17-nji iýulda geçirilen giňişleýin mejlisinde türkmen Lideriniň belleýşi ýaly, şu ýylyň 6-njy awgustynda «Awaza» milli syýahatçylyk zolagynda jemi 6 sany möhüm halkara çäre geçiriler. Olar
- Merkezi Aziýanyň döwlet Baştutanlarynyň konsultatiw duşuşygy;
- sebitiň ýurtlarynyň zenanlarynyň dialogy;
- Merkezi Aziýa ýurtlarynyň halkara sergisi;
- Merkezi Aziýa ýurtlarynyň ykdysady forumy;
- Merkezi Aziýa ýurtlarynyň halklarynyň milli tagamlarynyň sergisi;
- sebitiň ýurtlarynyň sungat ussatlarynyň dabaraly baýramçylyk konserti
Olaryň ählisi Türkmenistanyň Merkezi Aziýada halkara maslahatlaryň geçirilýän ýurdy hökmünde eýeleýän ornunyň barha pugtalanýandygyny görkezýär.
Şeýle hem Gurbanguly Berdimuhamedow ýurdumyzyň saglygy goraýyş ulgamynyň düzümleriniň howa menzilinde we serhet geçiriş nokatlarynda wekiliýet agzalarynyň polimeraz zynjyrly reaksiýa barlagyny guramagyň, kesgitlenen ýerlerde hereket edýän lukmançylyk nokatlarynyň gije-gündiziň dowamynda nobatçylygyny ýola goýmagyň zerurdygyny aýtdy.
Halkara forumlaryň geçirilýän döwründe düzgün-tertibi ýola goýmak, ýangyn howpsuzlygyny üpjün etmek meselelerine üns çekilip, degişli ýolbaşçylara anyk tabşyryklar berildi. Halkara çäreleriň geçirilýän döwründe «Awaza» milli syýahatçylyk zolagynyň ähli çäklerinde, myhmanhanalarda arassaçylyk, abadançylyk çärelerine-de möhüm ähmiýet berilmelidir.
