Google Samsung Galaxy Store programmalar dükanynyň Google Play-iň bäsdeşi bolup ýetişmezligi üçin, ony “ýok etmäge” çalyşdy diýip, «The Verge» web-saýty ýazýar.
ABŞ-nyň 36 ştatynyň we Waşingtonyň monopoliýa garşy beren arzasyna görä, Samsung kompaniýasy Galaxy Store-i kämilleşdirip başlanda, Google «howp abanýandygyny duýupdyr». Oňa bäsdeş bolmaga päsgel bermek üçin, Google, meselem, Android telefonlaryny öndürijiler bilen girdejini paýlaşmak şertnamasyny ulanýar. Android smartfonlaryny öndürijiler bilen gol çekilen bu resminama olara gajetlerine Play Market-den başga islendik programmalar dükanyny guramagy gadagan edýär.
Mundan başga-da, arzada kompaniýanyň Samsung-a öňdebaryjy işläp düzüjiler bilen hyzmatdaşlyk etmekden ýüz öwürmegi üçin gönüden-göni tölemekçi bolandygy tassyklanylýar. “Google üçin programmalary ýaýratmakda bäsdeşlik – bu ýok edilmesi zerur bolan wirus” – diýlip, resminamada bellenilýär.
Şeýle-de, Google işläp düzüjilere programmalaryny Google Play-den daşary ýaýratmazlyklary üçin pul hödürleýär. “The Verge-iň” ýazmagyna görä, Epic Games Fortnite-i Google Play Store-den daşary ýaýratmak kararyna gelende, bu çäreleriň köpüsi onuň bilen dawanyň “gönüden-göni netijesi” bolýar.
Google-iň özi Samsung Galaxy Store programmalar dükanynyň ösmegine päsgel bermäge synanyşyk edendigi bilen bagly aýyplamalary ret edýär. Ol özüniň blogunda bu aýyplamalary esassyz diýip belleýär.
