Ispaniýaly goragçy Serhio Ramos “PSŽ” bilen şertnama baglaşdy. Oýunçynyň klub bilen şertnamasy 2023-nji ýyla çenli niýetlenýär. Ol täze kluba erkin agent hökmünde geçdi diýip, championat.com habar berýär.
Serhio Ramos şertnamasynyň möhleti tamamlanandygy sebäpli, iýun aýynyň ahyrynda “Realdan” gitdi. Ol bu klub üçin 2005-nji ýyldan bäri çykyş edýärdi. “Şa kluby” oýunçy bilen şertnamanyň möhletini uzaltmady. “Real” bilen bilelikde Ramos bäş gezek Ispaniýanyň çempiony boldy, ýurduň iki Kubogyny we dört Super kubogyny aldy, dört gezek Çempionlar ligasynda ýeňiji boldy, şeýle-de üç gezek UEFA-nyň Super kubogynyň eýesi we dört gezek klublaýyn dünýä çempionatynyň ýeňijisi boldy.
Ispaniýanyň çempionatynyň geçen möwsüminde ol 15 oýna gatnaşyp, öz hasabyna iki gol ýazdy. Transfermarkt internet portaly oýunçynyň transfer bahasyny 10 mln ýewro bilen bahalandyrýar.
