BCG kompaniýasy «Şäher — her bir adam üçin» atly barlaglary geçirip, durmuş üçin iň özüne çekiji şäherleriň sanawyny kesgitledi. Kompaniýanyň barlaglarynyň netijelerini lenta.ru paýlaşýar.
Barlaglaryň çäginde bary-ýogy 16 şäher saýlanyp alnyp, olara birnäçe görkezijiler boýunça baha berildi. Hususan-da, durmuşyň hili, ykdysady mümkinçilikleri, jemgyýet we häkimiýet bilen gatnaşygy, şeýle-de şäherlileriň durmuşynda oňyn üýtgeşmeleriň depgini hasaba alyndy.
Şunlukda, ABŞ-nyň Nýu-Ýork şäheri birinji, Beýik Britaniýanyň London şäheri ikinji, Russiýanyň paýtagty Moskwa bolsa 63 bal bilen üçünji orny eýeledi.
«Moskwa durmuşyň hili we üýtgeşmeleriň tizligi boýunça öňdeligi saklaýan şäherleriň biri hasaplanýar. Aýratyn-da, Moskwanyň durmuşyň hili boýunça orny, ilkinji nobatda, «Jemgyýetçilik giňişligi», adatdan daşary ýagdaýlarda goraglylygyň ýokary derejesi, ekologiýa we bilim ulgamynda ýokary baly bilen kesgitlenilýär» diýip, barlaglarda aýdylýar.
