Italiýanyň “Ýuwentus” futbol kluby indiki Çempionlar ligasynyň möwsümine gatnaşmak hukugyny gazandy. Bu barada klubuň prezidenti we Super liganyň wise-prezidenti Andrea Anýelli habar berdi. Onuň teswirlerini “Ýuwentusyň” metbugat gullugy getirýär diýip, sportmail.ru belleýär.
Öň, Ýewropanyň Futbol Assosiasiýalary Birleşigi (UEFA) Super ligany esaslandyryjy klublar – “Ýuwentus”, şeýle-de Ispaniýanyň “Barselona” we “Real” klublary bilen bagly işi togtatdy.
“Biz Çempionlar ligasyna gatnaşmagymyzy tassyklaýan haty aldyk. Men ýewropa futbolyny kämilleşdirmek üçin gepleşikleri geçirmäge taýýardygymyzy ýene bir gezek nygtamak isleýärin. Biz haýbatlardan gorkmaýarys we özümiziň kanuny hereketlerimize ynanýarys” – diýip, Anýelli belledi.
19-njy aprelde “Mançester Ýunaýted”, “Mançester Siti”, “Tottenhem”, “Liwerpul”, “Çelsi” we “Arsenal” iňlis, “Barselona”, “Atletiko” we “Real” ispan, “Milan”, “Inter” we “Ýuwentus” italýan klublary Super liganyň döredilendigini habar berdiler. Janköýerleriň nägileliklerinden we Halkara futbol federasiýasynyň (FIFA) we UEFA-nyň sanksiýa haýbatyndan soň, Super ligada diňe “Real”, “Barselona” we “Ýuwentus” galdy. 7-nji maýda UEFA galan dokuz topar bilen ýaraşyk gazanylandygyny mälim etdi we Super ligany döretmek pikirine gaýdyp gelnen halatynda sanksiýa sanawyny neşir etdi.
