Beýik Britaniýadaky Bata uniwersitetiniň alymlary uçarlaryň hereketlendirijisiniň sesini iň pes derejä ýetirmegiň usulyny tapdylar. Bu barada «Nature Scientific Reports» žurnalyna salgylanyp, mir24.tv saýty maglumat berýär.
Hünärmenler uçaryň hereketlendirijisiniň sesini 80 göterime çenli peseldip, ýolagçylaryň rahatlygyny ýokarlandyryp biljek örän ýeňil materialy işläp düzdüler. Grafen oksidinden we poliwinil spirtinden alnan aerogel daşky gurluşy boýunça hamyrly süýjülige meňzeýär diýlip, ylmy makalada aýdylýar. Hatda bu materialy almagyň tehnikasy hem süýjülik bişirmek üçin ýumurtganyň agynyň çişirilişini ýatladýar. Ol adatdan daşary pes dykyzlykda bolup, kubmetrde bary-ýogy 2,1 kilogram agramy bar. Munuň özi onuň iň ýeňil ses geçirmeýän material bolmagyny şertlendirýär. Bu material uçaryň hereketlendirijisiniň sesini 105 desibelden 16 desibele çenli azaldyp bilýär. Bu bolsa saç guradyjy feniň çykarýan sesine ýakyndyr.
Mundan başga-da, materialyň ýeňilligi ony has peýdaly edip bilýär, çünki ol uçaryň umumy agramyna hem asla täsir etmeýär diýen ýaly. Alymlar öz oýlap tapyşlarynyň diňe bir aerokosmiki senagatda däl, eýsem, awtoulaglarda we deňiz gämilerinde, gurluşykda ulanyp boljakdygyna umyt bildirýärler.
