Daniýanyň paýtagtynda Daniýanyň milli ýygyndy toparynyň ýarym goragçysy Kristian Eriksen üçin diwar peýda boldy diýip, Kopengagende Ýewro-2020-niň resmi instagram-akkaunty habar berdi. Muny RIA Nowosti ýetirýär. Isleg bildirýän her bir adam diwara gelip, meşhur daniýaly oýunça öz isleg-arzuwlaryny ýazyp bilýär.
Ilkibaşda Ýewropa çempionatynyň oýunlaryna tomaşa etmek üçin fan-zolagynda ýerleşen diwar suratkeşleriň ýaryşyň wakalaryny suratlandyrmagy üçin döredildi. Eriksen bilen bagly wakadan soň, ähli isleg bildirýänlere diwarda oýunça isleg-arzuwlaryny ýazmaga we çekmäge rugsat berildi.
Şenbe güni Kopengagende geçirilen Ýewro-2020-niň Daniýa bilen Finlýandiýanyň ýygyndylarynyň arasyndaky oýnunyň birinji ýarymynyň ahyrynda Eriksen otuň üstüne ýykyldy. Lukmanlar birnäçe minutlap oýunça ilkinji kömegi berdiler, göni däl ýürek massažyny etdiler.
Soňrak UEFA oýunçynyň hassahanadadygyny, onuň özüne gelendigini we ýagdaýynyň durnuklydygyny habar berdi. Oýun tas iki sagat togtadyldy, soň bolsa dowam etdi hem-de Finlýandiýanyň milli ýygyndysynyň 1-0 hasabynda ýeňmegi bilen tamamlandy. Ýekşenbe güni Daniýanyň milli ýygyndysynyň baş tälimçisi Kasper Hýulmand Erikseniň meýdançada ýüregiň saklanma ýagdaýyny başdan geçirendigini aýtdy.
