Ýaponiýanyň Hökümeti koronawirus ýokajynyň ýaýramagynyň öňüni almak maksady bilen, Tokioda geçirilýän tomusky Olimpiýa oýunlaryny şöhlelendirjek daşary ýurtly žurnalistleriň hereketlerini yzarlar, şol sanda GPS arkaly berk gözegçilikde saklar. Bu barada «Tokio-2020-niň» Guramaçylyk komitetiniň başlygy Seýko Hasimoto habar berdi — diýip, tass.ru ýazýar.
«Biz žurnalistleriň ýerleşdirilişini olaryň özleri üçin niýetlenen ýerlerini taşlap gitmezlikleri ýaly GPS ulgamy arkaly berk gözegçilikde saklarys» diýip, ol Guramaçylyk komitetiniň mejlisinde aýtdy. Onuň sözlerine görä, daşary ýurtly metbugat wekilleri üçin öňünden ýörite bellenen myhmanhanalaryň sany, takmynan, 350-den 150-ä çenli azaldyldy. Munuň özi olary has amatly ýerleşdirmek we hemmesini bir ýerde jemlemek üçin edildi.
Habar berlişi ýaly, Ýaponiýa gelen pursadyndan başlap, iki hepdäniň dowamynda daşary ýurtly žurnalistlere jemgyýetçilik ulaglaryndan peýdalanmak gadagan ediler, olaryň şäher boýunça iş saparlary bolsa Guramaçylyk toparynyň işgärleriniň we ýerleşdirilen myhmanhanalarynyň gözegçiligi astynda bellenen ýerler boýunça güýçli çäklendiriler.
Olimpiadanyň Guramaçylyk toparynyň Baş sekretary Tosiro Mutonyň mejlisiň jemleri boýunça geçirilen metbugat maslahatynda bellemegine görä, daşary ýurtly žurnalistleri gözegçilikde saklamak hakyndaky çözgüt, onuň pikiriçe, metbugat azatlygyny çäklendirmek bilen bagly däl. «Biz, ilkinji nobatda, koronawirus ýokanjynyň ýaýramak töwekgelçiliginiň ýokarlanmazlygy babatda aladalanýarys» diýip, Muto aýtdy. GPS ulgamy arkaly gözegçilik žurnalistler Ýaponiýa gelenlerinden 14 günden soň bes ediler.
