Ýapon alymlary Fukusimanyň golaýynda ummanyň düýbüni 8023 metr çuňluga çenli burawladylar. Munuň özi burawyň çuňlugy boýunça rekord derejedir diýip, cursorinfo.co.il habar berdi.
Bu dünýä rekordy «Kaimei» gämisiniň ekipažy tarapyndan geçen aý goýlupdy. Ondan öňki rekord bolsa mundan 50 ýyl ozal hasaba alyndy. Şonda alymlar Marian çöketliginde 7034 metr çuňlukdan nusgalary alypdylar.
Fukusimanyň golaýynda rekord hökmünde hasaba alnan buraw işleri 2 sagat 40 minut dowam etdi. Onuň netijesinde döredilen guýyny taryhda iň çuň burawlanan we özleşdirilen suw obýekti diýip ynam bilen atlandyryp bolar.
Alymlar täze ekspedisiýanyň Ýaponiýada ýygy-ýygydan bolup geçýän ýer titremeleri barada has köp zat öwrenmäge mümkinçilik berjekdigine ynanýarlar. Mysal üçin, häzirki buraw meýdançasyndan uzak bolmadyk ýerde 2011-nji ýylda uly göwrümli Tohoku ýer titremesi bolup geçipdi. Hut şu Fukusima ýadro stansiýasyndaky betbagtçylyga uly göwrümli sunami sebäp bolupdy diýip, çeşme belleýär.
