18-nji maýda giňden bellenilen Türkmenistanyň Konstitusiýasynyň we Türkmenistanyň Döwlet baýdagynyň gününi dostlukly gruzin halky özboluşly sowgat bilen gutlady — Gruziýanyň esasy nyşanlarynyň biri hasaplanýan Tbilisiniň telewizion diňi türkmen baýdagynyň reňkleri bilen bezeldi. 274,5 metr belentlikdäki dag gerşinde şöhlelenen Döwlet tugumyzyň şekili ýurdumyzyň özygtyýarlylygynyň nyşany bolup, şäheriň gözel künjeginden halkymyzyň ýüreginiň ýylysyny ýaýdy.
Mälim bolşy ýaly, Tbilisiniň telewizion diňi paýtagta tebigy gözellik berýän Mtasminda dagynda, onuň bilen adybir seýilgähiň çäginde ýerleşýär. Deňiz derejesinden 719,2 metr beýiklikde gurlan bu telediňden tutuş şäher eliň aýasynda ýaly görünýär. Ýeri gelende bellesek, Türkmenistan bilen Gruziýanyň arasyndaky dostana gatnaşyklaryň nyşany hem-de türkmen halkyna çuňňur hormat hökmünde Tbilisiniň telewizion diňi döwlet Garaşsyzlygymyzyň şanly seneleri mynasybetli, geçen ýyllarda hem al-ýaşyl reňkde şöhle saçypdy. Ol Tbilisi şäher häkimliginiň we Türkmenistanyň Gruziýadaky ilçihanasynyň tagallasy bilen döwletlilik baýramymyzyň şanyna 19-njy maýda hem türkmen baýdagynyň reňklerinde öwşün atar.
