"Barselonanyň" hüjümçisi we kapitany Lionel Messi Ispaniýanyň Kubogynyň 1/8 finalynda "Raýo Walýekano" bilen bolan duşuşykda esasy düzümde meýdança çykyp, klubuň rekordyny täzeledi. Bu barada championat.com habar berdi.
Gök-narynçlaryň metbugat gullugynyň twitterdäki habaryna görä, bu duşuşyk argentinaly hüjümçiniň ýurduň kubogyndaky 76-njy oýny boldy. Şeýlelikde, Messi "Barselonanyň" ozalky hüjümçisi Hosep Samitýeriň kubokdaky 75 oýunlyk rekordyny täzelemegi başardy. Ispaniýanyň kubogynda gök-narynçlaryň düzüminde geçiren duşuşyklarynyň sany boýunça öňki ýarymgoragçy Andres Iniesta (73), öňki hüjümçi Wisent Pýer (71) we öňki ýarymgoragçy Xavi (70) ilkinjileriň hatarynda ýerleşýär.
Messiniň katalon kluby bilen häzirki şertnamasy 2021-nji ýylyň 30-njy iýunynda tamamlanýar. Argentinaly hüjümçi tomusky dynç alyş möwsüminde katalon klubundan gitmek isleýändigini aýtdy. Ýöne taraplar şertnamanyň ýatyrylmagy barada ylalaşyp bilmediler. Häzirki wagtda "Mançester Siti" we "Pari Sen-Žermen" oýunçy üçin esasy dalaşgärler hasaplanýar.
