«Gazprom» kompaniýasy 2020-2035-nji ýyllarda Türkmenistandan alýan tebigy gazynyň möçberlerini artdyrmagy meýilleşdirýär. Bu barada TASS agentligi 2035-nji ýyla çenli Russiýada gaz pudagyny ösdürmek boýunça umumy meýilnamanyň taslamasyna salgylanyp habar berýär.
«Gaz strategiýasyna laýyklykda, Russiýa 2020-2035-nji ýyllarda Türkmenistandan gaz satyn almagynyň möçberini ýyllyk 5,5 milliard kubmetre, Özbegistandan 2019-njy ýyl bilen deňeşdirilende 8 milliard kub metre çenli artdyryp biler» – diýlip, beýanatda bellenilip geçilýär.
Belläp geçsek, 2019-njy ýylda Türkmenistandan Russiýa 4 milliard kubmetr gaz akdyryldy. Şol döwürde Özbegistandan 7,7 milliard kubmetr, Gazagystandan bolsa 14,2 milliard kubmetr tebigy gaz iberildi.
Gaz importynyň umumy meýilnamasyndan görnüşi ýaly, 2020-nji ýylda Merkezi Aziýadan 26 milliard kubmetr tebigy gaz import edildi.
TASS-yň habar bermegine görä, 2025-nji ýylda eksport edilen rus gazynyň bahasynyň 1000 kub metr üçin 146 dollardan 211 dollar aralygynda boljakdygy mälim edilýär.
2020-nji ýylda “Gazprom” daşary ýurtlara 179,3 milliard kubmetr möçberinde tebigy gaz eksport etdi. Pandemiýa sebäpli 2019-njy ýyl bilen deňeşdirilende eksportyň möçberi 10 % peseldi.
