2020-nji ýylda awia heläkçiliginde ýogalanlaryň sany öňki ýyllara garanyňda, has köp. Bu barada To70 awiasiýa konsalting kompaniýasynyň statistikasyna salgylanyp, Reuters ýazýar. Muny RIA Nowosti ýetirýär.
Maglumatlara görä, 2020-nji ýylda uly ýolagçy söwda laýnerlerinde 40 heläkçilik bolup, olardan bäşisi adam pidasyna getirdi. Ölüm sany 299 boldy. 2019-njy ýylda 86 heläkçilik bolup, olardan sekiz sanysy adam pidasyna sebäp boldy, jemi 257 adam ýogaldy.
2020-nji ýylda awia heläkçiliginde ýogalanlaryň umumy sanynyň ýarysy Eýranyň howa giňişliginde gaçan ukrain uçarynyň ýolagçylarydyr. Heläk bolanlaryň sany: 176 adam. Ölüm sany boýunça ikinjisi maý aýynda 98 adamyň ölümine getiren Pakistanyň awialaýneriniň heläkçilige uçramagy boldy.
Flightradar24 web-saýtynyň maglumatlary boýunça, pandemiýa şertlerinde serhetleriň ýapylmagy sebäpli, 2020-nji ýylda uçuşlaryň sany 42 göterim azaldy.
Şeýle-de bolsa, soňky onýyllygyň dowamynda howa gatnawlary wagtynda ölüm sany ep-esli azaldy. Mysal üçin, 2005-nji ýylda uçarlaryň uly söwda gatnawlarynda 1015 adam ýogaldy. Awiasiýa üçin iň howpsuz ýyl 2017-nji ýyl boldy diýlip hasaplanylýar. Şonda tutuş ýylyň dowamynda 13 adamyň ölümine sebäp bolan iki awia heläkçiligi boldy.
