6 ýaşly hindi oglanjygy Arkham Om Talsaniýa 7 ýaşynyň dolmazyndan bir gün öň dünýäniň iň ýaş programmisti hökmünde Ginnesiň Bütindünýä rekordlar kitabyna girdi. Bu barada Cursorinfo habar berýär.
Arkham programmist statusyny almak üçin Python programmirleme dilinde ýörite okuw geçdi we Microsoftyň sertifikat synagyny üstünlikli tabşyrdy.
"Maňa programmirlemegi kakam öwretdi. Iki ýaşymda planşet ulanyp başladym. Üç ýaşymda bolsa iOS we Windowsly enjamlary edindim"-diýip, dünýäniň iň ýaş programmisti aýdýar.
Arkham kiçi oýunlar üçin programma üpjünçiligini ýazyp başlady we Ginnesiň Rekordlar kitabynyň wekilleriniň ünsüni özüne çekdi. Barlagdan soň, oglana dünýäniň iň ýaş programmisti adyny tassyklaýan şahadatnama gowşuryldy. Talsaniýa öz gezeginde telekeçi bolup, hemmelere kömek etmek isleýändigini aýtdy.
“Meniň telekeçi bolasym we hemmelere kömek edesim gelýär. Programmirlemek üçin programmalar, oýunlar we ulgamlar döretmek isleýärin. Mätäçlere-de kömek etmek isleýärin"-diýip, Arkham Om Talsaniýa belleýär.
