“PSŽ-niň” öňki futbolçysy Týago Motta pariž klubyna ýolbaşçylyk etmäge ýakyn. “RMC Sport” teleýaýlymynyň habar bermegine görä, 38 ýaşly braziliýaly hünärmen “PSŽ-niň” häzirki tälimçisi Tomas Tuheliň ornuny eýelemäge esasy dalaşgär bolup durýar. Muny prostoprosport.ru habar berýär.
Geçen möwsümde PSŽ Çempionlar ligasynyň finalyna çykmagy başardy we Fransiýanyň çempionatynda ýeňiji boldy. Muňa garamazdan Tuheliň tälim berýän topary bu möwsüme gowşak başlady. Geçen alty tapgyrdan soňra parižliler 12 utuk gazanyp, Liga 1-iň turnir tablisasynda dördünji orunda barýarlar.
Baş tälimçiniň ornuna dalaşgär hasaplanýan Týago Motta “PSŽ”-niň düzüminde 2012-2018-nji ýyllar aralygynda çykyş edipdi.
Oýunçy karýerasyny 2018-nji ýylyň maý aýynda tamamlan Týago Motta soňra tälimçi hökmünde “PSŽ” ýaşlar topary bilen işleşdi. Ol 2019-njy ýylda iki aýlap “Jenoa” italýan futbol toparynyň tälimçisi wezipesini hem alyp bardy.
Tuhel “PSŽ” futbol klubyna 2018-nji ýyldan bäri ýolbaşçylyk edýär. Onuň tälim berýän döwründe klub iki gezek Fransiýanyň çempiony boldy we Çempionlar ligasynyň finalyna çykdy. Tomas Tuheliň “PSŽ” bilen şertnamasy 2021-nji ýylyň tomsuna çenli hereket edýär.
