Türkmenistanda mümkinçiligi çäkli bolan adamlar üçin jemgyýetçilik taksisi hyzmaty ýola goýlar. Bu hili hyzmatlary ýerine ýetirmegiň düzgünleri "Türkmenawtoulaglary" agentligi tarapyndan işlenip düzüldi.
Düzgünlere laýyklykda, jemgyýetçilik taksisi — bu az hereketli raýatlary sosial taýdan möhüm desgalara, meselem, ýurduň häkimliklerine; Türkmenistanyň Adalat ministrligine we onuň ýerlerdäki bölümlerine; Türkmenistanyň Zähmet we ilaty durmuş taýdan goramak ministrligine we onuň territorial edaralaryna; ýaşaýyş jaýlaryna; pension gaznasy bölümlerine; saglygy goraýyş edaralaryna (gaýragoýulmasyz lukmançylyk kömegi ýagdaýlaryny hasaba almazdan); maýyplaryň jemgyýetçilik guramalaryna; awtomenzillere, menzillere we aeromenzillere (ýaşaýan ýerine tarap ýol boýunça, bejergä) äkitmek üçin ýeňillikli tarifi bolan hyzmat.
Jemgyýetçilik taksisi hyzmatynyň awtomobilleri ýörite ýük galdyrylýan mehanizmler bilen enjamlaşdyrylan, bu öz gezeginde arabaly-maýyplaryň gatnadylmagyny ýeňilleşdirýär.
Jemgyýetçilik taksisi hyzmatyndan adamlaryň kesgitli bir kategoriýalary peýdalanyp bilýär, has dogrusy:
- doglanyndan maýyp bolan çagalar;
- umumy keseliň (şol sanda iş bilen bagly bolmadyk şikesleriň), önümçilik şikesleriň, kär bilen bagly döreýän keselleriň netijesinde maýyp bolanlar;
- harby gullugyň maýyplary:
Jemgyýetçilik taksisinden iş günleri sagat 8:00-dan 17:00-a çenli peýdalanmak bolýar.
Talaplygy maýyplaryň jemgyýetçilik guramalary arkaly ýa-da 8:00-dan 17:00-a çenli iş wagtynda gönüden-göni telefon boýunça galdyrmak bolýar.
Möhüm: jemgyýetçilik taksisi hyzmatyna talaplygy gitmeli diýlip meýilleşdirilen günden üç iş güni öň galdyrmaly.
Jemgyýetçilik taksisi hyzmaty ylalaşyk esasynda amal edilýär. Hyzmat üçin tölegleri raýatlaryň özleri hem, olaryň garyndaşlary ýa-da jemgyýetçilik guramalarynyň wekilleri hem tölegiň islendik usuly arkaly amal edip bilýärler.
Bu düzgünler «Awtomobil ulagy hakynda», «Ýol hereketiniň howpsuzlygy hakynda» Türkmenistanyň Kanunlaryna, Türkmenistanyň Prezidentiniň 2015-nji ýylyň 21-nji awgustyndaky № 14384 belgili Kararyna we Ýolagçylary hem-de ýükleri awtomobil ulagy arkaly daşamagyň düzgünlerine laýyklykda, 2017-2020-nji ýyllar üçin zähmet we iş pudagynda maýyplaryň hukuklaryny doly durmuşa geçirmegi üpjün etmek boýunça çäräniň Meýilnamasyny ýerine ýetirmek maksady bilen işlenip düzüldi.
