Rospotrebnadzoryň “Wektor” döwlet ylmy merkezi täze koronawirus ýokanjyna garşy sanjymyň senagat önümçiligini noýabrda başlamagy meýilleşdirýär diýip, merkeziň baş müdiri Rinat Maksýutow habar berdi. Muny rg.ru ýetirýär.
“Biz önümçilige şu ýylyň noýabrynda çykmagy göz öňünde tutýarys. Şonuň üçin ýylyň ahyryna – indiki ýylyň başyna çenli yzygiderli köpçülikleýin sanjym işine, ilkinji nobatda, howp astyndaky toparlarda başlamak göz öňünde tutulýar” – diýip, ol “Rossiýa-1” telekanalynda “Habarlar” programmasynda aýtdy.
Öň, Rospotrebnadzoryň ýolbaşçysy Anna Popowa Saglygy goraýyş ministrliginiň “Wektor” tarapyndan taýýarlanylan COVID-19-a garşy sanjymyň howpsuzlygynyň we täsirliliginiň kliniki synaglaryny geçirmäge rugsat berendigini we onuň meýletinçilerde synagyna başlanandygyny aýtdy.
Mundan başga-da, wise-premýer Tatýana Golikowa Russiýa Federasiýasynyň Prezidentiniň gatnaşmagynda geçirilen ýurtda sanitar-epidemiologik ýagdaý boýunça mejlisde meýilnama boýunça bu sanjymyň döwlet bellige alnyşynyň sentýabrda bolmalydygyny, birinji senagat tapgyryny bolsa oktýabrda geçirmegiň meýilleşdirilýändigini habar berdi.
Belläp geçsek, Russiýada bir wagtda koronawirusa garşy dört sanjym taýýarlanylýar. Olaryň ikisi – Goranmak ministrliginiňki we Russiýanyň saglygy goraýyş ministrliginiň Gamalei adyndaky epidemiologiýanyň we mikrobiologiýanyň merkeziniňki – eýýäm adamlarda synagdan geçdiler.
