Bütindünýä saglygy goraýyş guramasy koronawirus pandemiýasy bilen baglanyşykly halkara adatdan daşary ýagdaý tertibini ýene üç aý uzaltdy diýip, RIA Nowosti agentligi habar berýär.
Bu barada Bütindünýä saglygy goraýyş guramasynyň adatdan daşary ýagdaýlar boýunça komiteti Ženewada geçirilen ýygnakdan soň mälim etdi.
Komitet COVID-19-yň henizem jemgyýetiň saglygy üçin çynlakaý howp bolup durýandygy we dünýäniň köp ýerinde alada döredýändigi bilen ylalaşýar. Şeýle hem komitet adatdan daşary ýagdaý düzgünini uzaltmak baradaky teklibini guramanyň baş müdiri Tedros Adanom Gebreýesusa hödürledi.
BSGG-niň ýolbaşçysy häzirki pandemiýanyň "asyrda bir gezek bolup geçýän, netijeleri ýakyn onýyllyklarda duýuljak" çökgünlikdigini aýtdy. Şeýle hem Gebreýesus Bütindünýä saglygy goraýyş guramasynyň immuniteti öwrenmek baradaky maglumatlaryna görä, wirusyň has kiçi göwrümde ýüze çykan ýurtlaryny hem hasaba almak bilen, dünýä ilatynyň aglaba böleginiň bu wirusa duçar bolýandygyny belledi.
Komitet Bütindünýä saglygy goraýyş guramasyna pandemiýa garşy göreşde dünýä hem-de sebit guramalaryny “utgaşdyrmagy we mobilizlemegi dowam etmegi", ýokançlygyň ýaýramagynyň öňüni almakda ýurtlara goldaw bermegi we koronawirusyň tebigy çeşmesini kesgitlemek boýunça gözleg işlerini çaltlaşdyrmaga ýardam bermegi maslahat berdi.
Bu BSGG-niň adatdan daşary ýagdaýlar boýunça komitetiniň 18 hünärmenden we 13 geňeşçiden ybarat dördünji ýygnagydy. Onuň maksady pandemiýa garşy göreşiň häzirki ýagdaýyna baha bermek we keseliň ýaýramagynyň öňüni almak üçin teklipleri taýýarlamak bolup durýar.
