Saud Arabystanynyň patyşasy Salman ben Abdel-Aziz Al Saud Er-Riýadyň hassahanasyna düşdi diýip, Neşir işiniň saud agentligi habar berýär, muny RBK ýetirýär.
Monarh öt haltasynyň çişmegi sebäpli hassahana ýerleşdirildi. Ol lukmançylyk barlaglaryndan geçer diýip, neşir anyklaşdyrýar. Korol Salman 84 ýaşynda. 18 ýaşynda – 1953-nji ýylda ol korolyň wekili we Er-Riýadyň emiri boldy. On ýyldan soň Salman Er-Riýad welaýatynyň gubernatorlygyna bellenildi we 2011-nji ýyla çenli bu wezipäni eýeledi. Bu döwürde Er-Riýad şäheri çalt ösüşe eýe boldy, onuň ilaty 1960-njy ýyllardaky 150 müňden 1980-nji ýyllarda milliona çenli artdy. Häzir Saud Arabystanynyň paýtagtynda 7 milliondan gowrak adam ýaşaýar.
Salman tagta 2015-nji ýylda çykdy, sebäbi ozalky korol Abdalla ýogaldy. Mirasdüşer şazada diýlip onuň dogany Mukrin ibn Abdul-Aziz Al Saud bellenilipdi.
Belläp geçsek, 18-nji iýulda Saud Arabystanynyň goňşusy bolan Kuweýtiň hökümeti bu döwletiň ýolbaşçysy emir Sabah al-Ahmed al-Jaber as-Sabahyň lukmançylyk barlaglaryndan geçmek üçin hassahana ýerleşendigini habar berdi. Onuň kiçi dogany we mirasdüşer şazada Nawaf al-Ahmed al-Jaber as-Sabah emiriň wezipeleriniň birnäçesini wagtlaýyn ýerine ýetirer. Soňrak lukmanlar emiriň operasiýa edilendigini we onuň üstünlikli geçendigini habar berdiler.
